مستەفا كازمی سەرۆك وەزیرانی عێراق رایدەگەیەنێت، لە ئەنجومەنی وەزیران بڕیاریان بۆ قەرەبووكردنەوەی قوربانیانی خۆپیشاندانەكان و چارەسەركردنی بریندارەكان دەركرد، بەڵام پەرلەمان ڕەتیكردەوە و دەشڵێت، “خۆمان بەدەستەوە نادەین و گەشبینم كە ئایندە باشتر دەبێت”.
مستەفا كازمی لەدیدارێكدا لەگەڵ بەشێك لە بریندارانی خۆپیشاندانەكانی ساڵی 2019 رایگەیاند، ئێوە بۆ داخوازییە ڕاستەقینەكان چونە دەرەوە لەماڵ و خۆپیشاندان كرد، ئامانجتان ژیانێكی شایستە بوو، بەڵام بەداخەوە هێرشكرایە سەرتان”.
وتیشی،” لە هەلومەرجێكی تایبەتدا هاتوین، هەوڵماندا بەدوای مافە تەواو و راستەقینەكانی ئێوەدا بگەڕێین، لە ئەنجومەنی وەزیراندا بڕیارمان دەركرد بۆ قەرەبوكردنەوەی قوربانیانی خۆپیشاندانەكان و چارەسەركردنی بریندارەكان، بەڵام بەداخەوە پەرلەمان ڕەتیكردەوە”.
ئاماژەی بەوەشكرد، “شەو بەڕۆژ بەردەوام دەبین بۆئەوەی بنەمایەكی سادە دابمەزرێنین، ئەویش گێڕانەوەی ئاوڕدانەوەیە بۆ هەموو عێراقییەكان، لەهەمو بارێكیشدا تەنانەت لە هەلومەرجی سەختیشدا دەبێت گەشبین بین، من بە ناوی هەمو عێراقییەكانەوە بەرپرسیارێتیەكانم لە ئەستۆ گرتوە، ئێوەش پەیامێكتان ئاراستەی كۆمەڵگەی نێودەوڵەتی كردوە كە دەرفەتێكمان هەیە بۆ گۆڕانكاری”.
مستەفا كازمی هەر لەو دیداردا لەگەڵ بریندارانی خۆپیشاندانەكان باسی لەوەكرد، “هەندێك لەداواكاریەكانتان پێشتر جێبەجێكراون، سەبارەت بە ناونیشان یان لۆگۆی نیشتمانی، ئێستاش لەڕێگاداین بۆ هەڵبژاردنی پێشوەختە، هیوادارین سەركەوتو بین لە گۆڕینی واقیعی خۆماندا”.
سەرۆك وەزیرانی عێراق راشیگەیاند، “خۆمان بەدەستەوە نادەین و گەشبینم كە ئایندە باشتر دەبێت، هەڵبژاردنەكانیش حكومەتێك دەهێنێتە پێشەوە كە شێواز و میكانیزمی دەبێت بۆ زاڵبون بەسەر ئاستەنگەكانی پێشتردا”.
