ئەندامێكی مەكتەی سیاسیی یەكێتی راگەیەنراوی كۆبوونەوەی هەندێك لە كەسایەتییە عەشایەری و سیاسیە عەرەبیەكان لە هەولێر لەبارەی ئاسایی كردنەوەی پەیوەندییەكان لەگەڵ ئیسرائیل رەتدەكاتەوە و جەخت لە بەردەوامی پشتیگیری كردنی حزبەكەی لە دۆزی فەلەستین دەكاتەوە.
رزگار حاجی حەمە، ئەندامی مەكتەبی سیاسیی یەكێتی سەبارەت بە كۆبوونەوەی هەندێك لە كەسایەتییە عەشایەری و سیاسیە عەرەبییەكان كە رۆژی هەینی لە شاری هەولێر لەژێر ناونیشانی (ئاشتی و گێڕاندنەوە) ئەنجامدراو پرسی ئاساییكردنی پەیوەندییەكانی لەگەڵ دەوڵەتی ئیسرائیل وروژاند و كاردانەوەی عێراقییەكانی لێكەوتەوە، رایگەیاند: ” ئێمە وەكو یەكێتیی نیشتمانیی كوردستان، بەتوندی ئەنجامدانی كۆبوونەوەی لەو جۆرە، چ لە هەرێمی كوردستان و چ لە هەر شوێنێكی عێراق رەتدەكەینەوەو پابەندبوونی مەبدەئیمان بە پشتگیریكردن لە دۆزی رەوای فەلەستین دووپات دەكەیەنەوە و جەخت لەوە دەكەینەوە كە هەر هەڵوێستێك سەبارەت بە سیاسەتی دەرەكی بەپێی دەستووری عێراق، بەشێوەیەكی رەها تەنها لە دەسەڵاتی حكومەتی فیدراڵیدایە”.
وتیشی: “یەكێتیی نیشتمانیی كوردستان ئیدانەی هەوڵی دەستوەردان لە پرسی سیاسەت و پرەنسیپە دەرەكییەكانی دەوڵەتی عێراق دەكات و هەوڵی تێكدانی سەقامگیری و ئاسایشی عێراق و دروستی كردنی قەیران لەم كاتەدا بە كارێكی ناڕەوا و ناشیاو وەسف دەكات”.
رزگار حاجی حەمە باسی لەوەشكرد: لەگەڵ خستنەگەڕی هەوڵەكانداین بۆ پتەوكردنی پەیوەندییەكانی نێوان هەرێم و ناوەند، لەپێناو بەهێزكردنی یەكێتیی نیشتمانی.
