ئومێد ئەحمەد وتەبێژی وەزارەتی كارەبای حكومەتی هەرێم رایگەیاند، خواست لەسەر كارەبا زیادی كردووە و بەهۆی ئەوەشەوە كورتهێنان گەیشتووەتە هەزار و 500 مێگاوات.
ئومێد ئەحمەد لە راگەیەندراوێكدا ئاماژەی بەوەداوە، لە ئێستادا خواست لەسەر بەكارهێنانی كارەبا 4 هەزار و 500 مێگاواتی تێپەڕاندووە و بەرەو 5 هەزار دەڕوات.
رونیشیكردووەتەوە، ئەوەش لەكاتێكدایە كە بڕی بەرهەمهێنانی كارەبا لە هەرێمی كوردستاندا تەنها 3 هەزار و 500 مێگاواتە، بۆیە كورتهێنان گەیشتووەتە هەزار و 500 مێگاوات.
هەرێمی كوردستان و عێراق بەردەوام كێشەی كەمی كارەبایان هەبووە و سەرەڕای خەرج كردنی بودجەیەكی زەبەلاح لەو كەرتەدا تاوەكو ئێستا چارەسەر نەبووە، هەموو ساڵێكیش لە وەرزی زستان و سەرمادا بڕی كارەبا كەمتر دەبێتەوە.
