لە كەلار گروپێكی بازرگان و بەكارهێنەری ماددەی هۆشبەر دەستگیر كران كە لە 7 كەس پێكهاتوون و لەكاتی دەستگیر كردنیشیاندا دەست بەسەر چەند جۆرێك ماددەی هۆشبەردا گیراوە.
مقدەم علی جەمال قدووری بەڕێوەبەری راگەیاندنی پۆلیسی گەرمیان بڵاویكردووەتەوە، دوای وەرگرتنی زانیاری و بەدواداچونی ورد و وەرگرتنی فەرمانی دادوەر، بەشی پۆلیسی كەلار لەسنوری گەرمیان گروپێكی 7 كەسی لە بازرگان و بەكارهێنەری ماددەی هۆشبەر دەستگیر كرد.
ئەوەش هاتووە، تۆمەتبارەكان 6یان دانیشتووی قەزای كەلارن و یەكێكیان دانیشتووی شاری هەولێرە، لەگەڵ تۆمەتباراندا دەستگیراوە بەسەر ماددەكانی جۆری كریستاڵ و تلیاك و ئامێرەكانی بەكارهێنانی ماددە هۆشبەرەكان.
بەڕێوەبەری راگەیاندنی پۆلیسی گەرمیان هێمای بۆ ئەوەش كردووە، لەئێستادا بەبڕیاری دادوەر و بەپێی ماددەی 30 لەیاسای ماددە هۆشبەرەكان بەندكراون و لێكۆڵینەوە لەگەڵیان بەردەوامە.
