سەرچاوەیەك لە هاوپەیمانی سیادە ئاشكرای كرد، هاوپەیمانی سی قۆڵی كۆبوونەوەیەكی گرنگ لە هەولێر ساز دەكات، ئەوەش بۆ تاووتوێكردنی بنبەستی سیاسی و رێگاكانی چارەسەركردنی و پێكهێنانی حكومەتی زۆرینەی نیشتیمانی و یەكلاكردنەوەی پۆستی سەرۆك كۆمار.
ئەو سەرچاوە بە میدیاكانی وتووە، هاوپەیمانی سێقۆڵی كۆبوونەوەیەكی گرنگ لە شاری هەولێر دەكەن و هەریەكە لە خەمیس خەنجەر و محەمەد حەلبوسی و نوێنەرێكی موقتەدا سەدر بەشداری كۆبونەوەكە دەبن.
بەپێی وتەی هەمان سەرچاوە، كۆبونەوەكە تەنها بۆ تاووتوێكردنی رێگاكانی دەرچوون نییە لە بنبەستی سیاسی، بەڵكو بۆ دیاریكردنی هەنگاوەكانی دواترە بۆ پێكهێنانی حكومەتی زۆرینە و پەنابردن بۆ بژاردەی دیكە.
پێشتر پارتی دیموكراتی كوردستان كە بەشێكە لە هاوپەیمانی سێ قۆڵی باسی لەوەكردبوو، جموجوڵێك لەئارادایە بۆ كۆبونەوە لەگەڵ لایەنە سیاسییەكان لەپێناو شكاندنی بەستەڵەكی سیاسی و دۆزینەوەی دەرچە بۆ ئەو قەیرانەی لەدوای هەڵبژاردنەوە بەرۆكی عیراقی گرتوە.
