جێگری سەرۆكی حكومەتی هەرێمی كوردستان رایگەیاند: پێویستە حكومەت هانی خاوە پرۆژەو وەبەرهێنەرەكان بدات تا سود لە وزەی خۆر ببینن بۆ بەهەمهێنانی كارەبا.
لەمیانی وتەیەكیدا لە كردنەوەی پرۆژەیەكی بەرهەمهێنانی كارەبا بە تیشكی خۆر (سۆلەر) قوباد تاڵەبانی جێگری سەرۆكی حكومەتی هەرێمی كوردستان رایگەیاند: بەپێی ئامارێك كە بەردەستكەوتوە پێنج ملیۆن مۆلیدە لە عیراق كاردەكات، دەبێت ئەم ژمارەیە چەند كاریگەریی لەسەر ژینگە هەبێت، جگە لە ژاوەژاو و وایەرەكانی كە بە ستونەكاندا هەڵواسراوەو سیمایەكی ناشیرینی بەخشیوە بەشارەكان، بۆیە سود وەرگرتن لە وزەی خۆر هەنگاوێكی گرنگە.
قوباد تاڵەبانی داواشی لە سەرمایەدارەكان و ئەوانەی پرۆژەو كارگەیان هەیە سود لە وزەی خۆر ببینن لە بەرهەمهێنانی كارەبا بۆ پرۆژەكانیان، وتیشی: داوا لە حكومەتەكەی خۆم و دەستەی وەبەرهێنان دەكەم هانی ئەوانە بدەن كە پرۆژەیان هەیە سود لە وزەی خۆر ببینن، بۆ پاراستنی ژینگە.
لەبەشێكی تری قسەكانیدا قوباد تاڵەبانی رایگەیاند: ئەم پرۆژەیە دوو مێگاوات كارەبا دەگەڕێنێتەوەو حكومەتی هەرێمیش بە دادپەروەیی هەوڵدەدات دابەشیبكات بەسەر شارو شارۆچكەكاندا، ئێمە لە حكومەت كۆبونەوەمان كردوە بۆئەوەی لەنێوان شارەكاندا دادپەروەری هەبێت و ئەو غەدرەی كە پێشتر باس دەكرا لە شارەكان جیاوازی هەیە ئەوە نەمێنێت.
