سیراج بارزانی سەرۆكی ئەنجومەنی گشتی راژەی حكومەتی هەرێم دەڵێت، هەوڵ هەیە دوبارە دەرگای دامەزراندن بكرێتەوە و ساڵانە بەشێك لە دەرچووان دابمەزرێندرێن.
سیراج بارزانی لە وتارێكی ڤیدیۆییدا وتویەتی، كابینەی نۆیەم زۆر گرنگی بە كەمكردنەوەی خەرجییەكان و زیادكردنی داهات داوە، بۆ ئەوەی بتوانێت دوبارە دەرگای دامەزراندن بكاتەوە و ساڵانە ئەگەر ژمارەیەكی رەمزییش بێت لە دەرچووان دابمەزرێنێت، بەجۆرێك بارقورسی لەسەر حكومەت دروست نەكات.
وتوشیەتی، پێداچوونەوە بە میلاك و راژەی فەرمانبەراندا دەكرێت، هەر بۆیە ئەنجومەنی گشتی راژە دامەزراوە، پێداچونەوە بە میلاكدا دەكەن و دوبارە دابەشكردنەوە بۆ راژەی فەرمانبەران بەپێی پسپۆڕی دەكەن ئەویش بە راوێژ لەگەڵ فەرمانبەران، لە هەموو دامودەزگاكان و سێكتەرەكان ژمارەی فیعلی فەرمانبەران دەستنیشان دەكەن، بەڵام فەرمانبەران دڵنیا دەكەنەوە گواستنەوەیان بە راوێژ دەبێت.
سەرۆكی ئەنجومەنی گشتی راژە جەختی لەوەش كردووەتەوە، دامەزراندنی ئەنجوومەنی راژە بەشێكە لە هەنگاوەكانی چاكسازی كابینەی نۆیەم، مەبەست لەو ئەنجومەنە،دوبارە دابەشكردنەوەی توانا مرۆیی و پسپۆڕییەكانی فەرمانبەرانە بەسەر دامەزراوەكاندا.
