واژۆ
رەجەب تەیب ئەردۆغان سەرۆك كۆماری توركیا دەڵێت، پرۆسە سەربازییەكانیان دژی گروپە كوردیەكان بەردەوام دەبێت و داوای رێپێدانیش لە كەس ناكەن.
ئەردۆغان لە كۆبونەوەیەكی حكومەتی وڵاتەكەی لە ئەنقەرە وتی، نامەی هێرشەكەی ئیستەنبوڵیان پێگەیشتووە و بە ئاشكرا لێی تێدەگەن، شەڕی گروپە تیرۆرستیەكان دەكەن (بە وتەی خۆی) و بەردەوام دەبن.
ئاماژەی بەوەشداوە، وەڵامی راستەقینە بۆ هێرشە تیرۆرستیەكان لەسەر زەوی دەبێت، توركیا پابەندە بە بەردەوام بوون لەسەر پرۆسە سەربازییەكانی بۆ كۆتایی هێنان بە تیرۆر لەسەر سنورەكانی باشوری.
ئەردۆغان هێمای بۆ ئەوەش كردووە، ئامانجی توركیا دروستكردنی پشتێنێكی ئەمنییە بە پانتایی 30 كیلۆمەتر لەسەر سنورەكانی باشور، روداوەكانی ئەم دواییە پیشانی دەدەن كە توركیا مافی خۆیەتی و گرنگیشە ئەو پشتێنە ئەمنییە دروست بكات.
پێشی وایە، نابێت كەس لە پرۆسە سەربازییەكانیان لە دەرەوەی سنوری توركیا نیگەران بێت، چونكە مێژووی توركیا خاڵییە لە كوشتارگە و كۆمەڵكوژی و هەڕەشە.
